beth sy’n newydd

Bydd celf a cherddoriaeth yn uno ar Fawrth y 1af, Dydd Gŵyl Ddewi wrth i arlunwyr adnabyddus ddangos eu cefnogaeth i Ŵyl Delynau Rhyngwladol Cymru sy’n cael ei chynnal yng Nghaernarfon rhwng Ebrill 4ydd ac Ebrill 10fed, 2010.

Mae pedwar o arlunwyr cyfoes mwyaf dawnus Cymru wedi rhoi darlun i’w werthu ar safle we ocsiwn eBay o Fawrth 1af ymlaen er mwyn codi arian tuag at yr Ŵyl. Mae Catrin Williams, William Selwyn, Gareth Parry ac Eluned Tudor Grant wedi cyfrannu darluniau arbennig er mwyn dangos eu cefnogaeth i’r Ŵyl ryngwladol arbennig hon.

Mae’r ocsiwn gelf yn un o nifer o brosiectau eleni gan yr Ŵyl sy’n cysylltu celf weledol â cherddoriaeth gyda phrosiectau celf yn cael eu cynnal mewn ysgolion lleol cyn yr Ŵyl ynghŷd ag arddangosfa gelf yn ystod yr Ŵyl rhwng 4ydd a 10fed o Ebrill.

Yn cael ei chynnal am yr ail dro yng Nghaernarfon mae’r Ŵyl yn denu dros 140 o gystadleuwyr o bell ac agos gan gynnwys America, Rwsia, Israel, Siapan a Tsieina, gyda thelynorion yn cystadlu mewn pum cystadleuaeth am wobrau megis Telyn Gyngerdd gwerth £20,000 gan brif noddwyr yr Ŵyl, Camac, Telynau Ffrainc. Eleni fe fydd yr Ŵyl Delynau Rhyngwladol yn cael ei chynnal er cof am y telynor dall, John Parry o Riwabon er mwyn dathlu 300 mlynedd ei enedigaeth.

Wedi ei eni ger Nefyn yng Ngwynedd yn 1710, daeth John Parry’n un o delynorion gorau’r cyfnod Baróc. Fe astudiodd mab John Parry, William Parry (1743-1791) fel arlunydd portread gyda Joshua Reynolds gan ddarlunio llun o’i dad a fydd yn cael ei arddangos yn ystod yr Ŵyl drwy ganiatâd hael ei berchennog, Miles Wynn Cato (www.welshart.co.uk). Y darlun cywrain hwn oedd craidd y syniad o ddatblygu prosiectau sy’n cysylltu cerddoriaeth â chelf yn ystod yr Ŵyl.

Meddai Elinor Bennett, Cyfarwyddwraig yr Ŵyl; “Fe hoffai trefnwyr yr Ŵyl ddiolch yn fawr iawn i William Selwyn, Gareth Parry, Catrin Williams ac Eluned Tudor Grant am eu haelioni drwy gyfrannu darn o’u gwaith ac rwy’n gobeithio y byddwn ni, drwy’r ocsiwn gelf, yn gallu cyrraedd cynulleidfa newydd i’r Ŵyl Delynau. Yn ogystal, rwy’n gobeithio y bydd cerddoriaeth yn fodd i greu marchnad newydd i’r arlunwyr Cymreig arbennig yma.”

Mae’r pedwar llun ar hyn o bryd i’w gweld yn Gallerie Galles, 7 Romilly Crescent yng Nghaerdydd ble y gall darpar brynwyr alw draw i’w gweld cyn iddynt fynd ar werth ar eBay am ddeng niwrnod ar Fawrth y 1af. Mae’r pedwar arlunydd yn adnabyddus am eu gwaith cain ac wedi dewis eu darn i’r ocsiwn yn ofalus.

Ychwanegodd Elinor Bennett; “Mae’r pedwar darlun yn rhai arbennig iawn ac wedi eu hysbrydoli gan wahanol agweddau o dirwedd, hanes a diwylliant Cymreig. Maen dyled ni i’r pedwar arlunydd am eu haelioni yn fawr ac rwy’n gobeithio y bydd yr ocsiwn yn denu’r sylw a’r pris sy’n haeddiannol i bedwar o arlunwyr gorau Cymru. Rwy’n annog unrhyw un sydd â diddordeb mewn celf neu ddiwylliant i roi cynnig a chefnogi’r dull cyffrous a newydd hwn o godi arian!”

Er mwyn rhoi cynnig ar y darluniau bydd angen i brynwyr roi’r teitl Wales International Harp Festival yn y porwr ar wefan ocsiwn eBay ble y bydd pob darlun ar gael i’w brynu o Fawrth 1af ymlaen. Bydd arian sy’n cael ei godi gan yr ocsiwn yn cael ei ddefnyddio ar gyfer dosbarthiadau meistr a gweithdai gyda thelynorion byd-enwog a fydd yn gweithio gyda chystadleuwyr ifanc yn ystod Gŵyl Delynau Rhyngwladol Cymru 2010 ym mis Ebrill.