beth sy’n newydd

Mae Cerddoriaeth Siambr yng Nghymru yn edrych ymlaen at ddadeni newydd wrth i ddeg cerddor arbennig gael eu dewis i gymryd rhan yn Academi Cerddoriaeth Siambr gyntaf Ensemble Cymru gan gymryd eu cam cyntaf ar daith glasurol iawn.

Mae’r Academi, y cyntaf o’i fath yng Nghymru, sydd wedi ei leoli yng Nghanolfan Ucheldre Caergybi, Ynys Môn, yn rhoi’r cyfle i gerddorion ifanc dan 19 oed dderbyn hyfforddiant o’r radd flaenaf mewn cerddoriaeth siambr. Wedi ei lansio ym mis Tachwedd 2009, bydd yr Academi’n cael ei gynnal am chwe mis gan orffen gyda pherfformiad arbennig gan y cerddorion ar Ebrill 25, 2010 yng Nghanolfan Ucheldre.

Dewiswyd pob cerddor i gymryd rhan yn y fenter ar gryfder eu profiad, brwdfrydedd a safon eu chwarae ac fel rhan o’u profiad dysgu yn yr Academi bydd y deg cerddor yn perfformio ochr yn ochr â rhai o brif gerddorion Ensemble Cymru. Byddent hefyd yn cael eu hyfforddi yn eu hensemble eu hunain ac yn cael y cyfle i fwynhau perfformiadau gan rai o oreuon Ensemble Cymru yn ystod y flwyddyn.

Bydd gweithdai busnes cerddoriaeth hefyd yn cael eu cynnal gan Swyddog Gweithredol Ensemble Cymru gan roi cymorth i’r cerddorion ddatblygu sgiliau hanfodol er mwyn rheoli a hyrwyddo eu hensemble proffesiynol eu hunain.

Mae gan Ensemble Cymru raglen flynyddol o dros 150 o gyngherddau a gweithdai ar gyfer dros 15,000 o bobl o bob oed. Cafodd ei enwi ar restr fer o 3 ensembles yng Ngwobrau Cymdeithas Gerddorol y Ffilharmonig Brenhinol yn 2006. Mae Ensemble Cymru hefyd yn Ensemble preswyl yng Ngŵyl Gerddoriaeth Ryngwladol Gogledd Cymru ym Mhrifysgol Bangor, Ysgol Rydal Penrhos a Gŵyl Fama, Sir y Fflint ac yn weithgar iawn yn hyrwyddo traddodiad cerddoriaeth siambr Gymreig mewn cymunedau ac ysgolion ar draws Cymru ac yn rhyngwladol.

Mae’r Academi yn derbyn cymorth ariannol gan Ymddiriedolaeth Cerddoriaeth Môn a Chyfeillion Cerddoriaeth Ieuenctid Gwynedd gyda chefnogaeth gan Ganolfan William Mathias, Gwasanaeth Cerdd William Mathias a’r cynrychiolwyr athrawon lleol, Margaret Scourse a Jane Parry.

Meddai Cyfarwyddwr Artistig Ensemble Cymru, Peryn Clement-Evans, “Bwriad Academi Gerddoriaeth Siambr Ensemble Cymru yw i ysbrydoli cerddorion ifanc ac i feithrin eu brwdfrydedd am un o fathau anoddaf ac ysbrydoledig o gerddoriaeth sydd i’w chwarae.

“Yn draddodiadol mae cerddoriaeth siambr ar gyfer rhwng 2 a 30 o gerddorion. Mae’r gair siambr yn awgrymu fod y gerddoriaeth yn cael ei berfformio mewn ystafell fechan, mewn ystafell breifat gydag awyrgylch glos yn aml iawn. Oherwydd ei natur glos, mae cerddoriaeth siambr yn aml iawn yn cael ei alw’n ‘gerddoriaeth i gyfeillion’. Mae’r traddodiad yng Nghymru yn dyddio’n ôl i ddechrau’r 20fed Ganrif wedi ffurfio triawdau’r colegau yn yr 1920 ond sydd bellach wedi diflannu.

“Mae rhai o fawrion mwyaf y byd cyfansoddi, ddoe a heddiw gan gynnwys William Mathias, Alun Hoddinott, Daniel Jones, Grace Williams, Huw Watkins, Gareth Glyn a Guto Puw wedi cyfansoddi ar gyfer y traddodiad hwn, traddodiad sydd o safon byd enwog ac yn un o drysorau mwyaf Cymru ond sydd hefyd wedi ei anwybyddu a`i anghofio i ryw raddau.

“Mae’r deg cerddor ifanc wedi fy syfrdanu gyda’u brwdfrydedd ac rwy’n gobeithio y byddwn ni drwy eu hymroddiad hwy ac ein cefnogaeth ni yn gweld dechrau cyfnod newydd yn hanes cerddoriaeth siambr yng Nghymru.