|
"Cefnogi, hyrwyddo, a darparu adnodd
gwybodaeth
am gerddoriaeth Cymru."
Nod Canolfan Hysbysrwydd Cerddoriaeth Cymru (CHCC) yw
cefnogi a hyrwyddo cerddoriaeth Gymreig o bob math. Mae'r
Ganolfan yn casglu ac yn cadw sgorau ymchwil cyfansoddwyr
Cymreig, recordiadau o gerddoriaeth Cymru a deunydd cyfeirio,
ac mae'n darparu gwasanaeth gwybodaeth ar gerddoriaeth Cymru.
Mae CHCC yn gweithio gyda sefydliadau eraill er mwyn cynnig
cefnogaeth i gyfansoddwyr drwy annog, hyrwyddo a hysbysebu
perfformiadau.
Gellir cael mynediad ar lein i archif CHCC drwy'r wefan, ac
mae hyn yn rhoi cyfle delfrydol i gyfansoddwyr ddarparu
rhestri cyfamserol o'u gweithiau yn ogystal â rhoi i
ddefnyddwyr restr gynhwysfawr o'r hyn sydd ar gael yn y
Ganolfan. Mae'r wefan hefyd yn hysbysebu digwyddiadau, eitemau
newyddion a chyfleoedd, yn gystadlaethau rhyngwladol,
perfformiadau neu'n weithdai addysgol.
Mae Canolfan Hysbysrwydd Cerddoriaeth Cymru yn cynnig
cefnogaeth bellach drwy annog perfformiadau o gerddoriaeth
Cymru yn y wlad hon a thros y môr. Ar y cyd gyda Ffederasiwn
Cerddoriaeth Amatur Cymru, mae CHCC yn ceisio hybu comisiynau
newydd gan gyfansoddwyr Cymru heddiw, ac mae'n gweithio gyda
Chyngor Celfyddydau Cymru er mwyn sicrhau y bydd yr archif yn
derbyn copïau ymchwil o weithiau newydd sy'n cael eu
comisiynu drwy gynlluniau Cyngor y Celfyddydau.
Yng Nghanolfan Mileniwm Cymru, mae gan CHCC stiwdio
recordio sy'n prysur ddatblygu ac sy'n croesawu amrywiaeth
gyfoethog o artistiaid, ensemblau ac arddulliau. Mae CHCC
hefyd yn cyhoeddi nifer o lyfrynnau addysgol, megis ei chyfres
o Restri Repertoire, ac mae'n ymdrechu i annog pobl i
werthfawrogi a mwynhau cerddoriaeth Gymreig, yng Nghymru ei
hun, yn ogystal ag yn rhyngwladol drwy ei chysylltiadau â
chanolfannau hysbysrwydd cerdd eraill ar draws y byd.
Ym mis Tachwedd 2004, symudodd Canolfan Hysbysrwydd
Cerddoriaeth Cymru, fel rhan o Ty Cerdd-Music Centre Wales, i
Ganolfan Mileniwm Cymru. Mae'r bartneriaeth rhwng Ffederasiwn
Cerddoriaeth Cymru, Canolfan Hysbysrwydd Cymru a Chelfyddydau
Cenedlaethol Ieuenctid Cymru wedi rhoi bod i ganolfan gerdd
un-stop, sy'n "dod â byd o gerddoriaeth i Gymru a
cherddoriaeth Cymru i'r byd."
|
